O noso centro créase en 1999 e case que dende os inicios incorpora a súa oferta formativa ensinanzas de Formación Profesional.

Dende o 2011 o CIFP Paseo das Pontes pertence á rede de centros integrados de Formación Profesional e un ano despois obtén a certificación para o Sistema de Xestión da Calidade (ISO:9001:2015).

A nosa responsabilidade é liderar e ser referente da formación no sector da Hostalaría, da Industria Alimentaria e do Téxtil, familias que poden estudarse no noso centro.

Centrados no alumnado coma protagonista indiscutible, pretendemos desenvolver o capital humano investindo en intelixencia, ofrecendo accións formativas que incorporan factores de innovación, excelencia e tradición, que fagan posible a achega de solucións, atentos á exixencia actual de cohesión dos sistemas educativo e produtivo.

Finalmente é a nosa vocación engadir valor á sociedade e aos sectores das nosas familias profesionais en particular, procurándolles aos profesionais presentes e futuros as competencias necesarias para emprender os retos de flexibilidade, reciclaxe, acreditación e formación ao longo da vida que tanto demanda o mercado laboral. Por iso, ademais de ciclos de grao básico, medio e superior, no noso centro é posible acreditar competencias profesionais ou participar en accións formativas para desempregados.

O compromiso do centro por acadar un ensino de calidade reflíctese tamén na nosa visión e valores.