Feira Gastronómica
O CIFP Paseo das Pontes convértese nunha feira gastronómica grazas ao traballo colaborativo do alumnado de Hostalaría
O pasado venres, o CIFP Paseo das Pontes viviu unha xornada moi especial ao converterse nunha auténtica feira gastronómica, froito do traballo conxunto do alumnado dos ciclos medios e superiores de Cociña e de Servizos en Restauración, coa colaboración do alumnado do ciclo medio de Panadaría.
Durante a actividade, a comunidade educativa tivo a oportunidade non só de coñecer pratos representativos de diferentes rexións, senón tamén de degustalos, comprobando de primeira man a calidade das elaboracións, a coidada presentación e a correcta atención ao público.
Esta iniciativa permitiu ao alumnado poñer en práctica competencias clave da súa formación: planificación, traballo en equipo, coordinación entre departamentos, elaboración culinaria, servizo en sala e atención profesional, nun contexto real e dinámico.
A feira gastronómica converteuse así nun exemplo claro da filosofía da Formación Profesional: aprender facendo, compartir coñecementos e achegar á comunidade o resultado do traballo realizado nas aulas e talleres do centro.
Desde o CIFP Paseo das Pontes queremos felicitar a todo o alumnado e profesorado implicado polo seu esforzo, implicación e excelente resultado final, que se pode apreciar nas imaxes da xornada.
